Í hverjum mánuði fá mörg hundruð manns vinning í Happdrætti SÍBS og hundrað útskrifast úr endurhæfingu á Reykjalundi. Þessi órjúfanlegu tengsl happdrættisins og skjólstæðinga endurhæfingarinnar mynda þungamiðjuna í nýrri herferð sem við gerðum fyrir Happdrætti SÍBS, sem er í dag eini fjárhagslegi bakhjarl framkvæmda og viðhalds fasteignanna á Reykjalundi. Án happdrættisins væri ekki mögulegt að taka á móti fólki þangað, í endurhæfingu eftir slys eða veikindi og aðstoða það við að komast aftur út í lífið – sem er auðvitað stærsti vinningurinn af þeim öllum, sá sem kallar fram breiðasta brosið. Það þekkja þau sem koma fram í auglýsingunum betur en flestir, en þau hafa öll lokið endurhæfingu á Reykjalundi, eða eiga miða í happdrættinu, og sum hvort tveggja.

Svenni Speight leikstýrði kvikmynduðu auglýsingunum og tók ljósmyndirnar, Bergþór Pálsson les og undir öllu saman ómar hinn eini sanni Söngur SÍBS eftir Oddgeir Kristjánsson, í einkar smekklegri útsetningu Bigga Tryggva. Sérstakar þakkir fá módelin, þau Katrín, Nadía, Ásgeir og Karim, fyrir að taka þátt í þessu verkefni með okkur.